‘A’AHI FAKA’OSI SENIALE FALANISE
Na’e fakahoko ‘e he patuni mei he Navy ‘a e Tau Malu’i Fonua ‘a Tonga, ‘i Touliki he uike faka’osi ‘o Sune, ha aka’apa’apa faka’osi kia Pilikatia Seniale Gilles Roberts koe pule ‘oe kau tau Falanise ‘i he Pasifiki. Lolotonga ‘a e taimi ko ia ‘o Pilikatia Roberts he Pasifiki, na’e ngaue vaofi ‘aupito ai ‘a e kau tau malu’i fonua ‘a Falanise mo Tonga ni. Na’e puna mai pe foki ‘a e pilikatia ni moe timi mei he kau tau Falanise ‘i Tahiti moe Pasifiki, ‘i he vakapuna ‘a e kau tau Falanise.
Na’e fakahoko ai ‘a e ngaahi laka moe fakame’ite mei he Navy ‘a Tonga, pea faka’ofo’ofa ‘aupito ‘a e ouau fakakautau na’e fakahoko ma’ae pilikatia mo ‘ene kau folau. Na’e fai ai mo ‘ene lea fakamalo kia Pilikatia Seniale Tau’aika ‘Uta’atu ‘i ha kapani mo e ngaue lelei na’e hoko ‘i hona vaha’a pea mo ‘ena kau tau kae’uma’a hona ongo fonua. Na’e fakahoko ‘e Pilikatia ‘Uta’atu ha fakamalo ma’ae Tau Malu’i Fonua ‘a Tonga.
Ko e kau fakaafe fakalangilangi na’a nau me’a atu ki he fakaafe ‘a e Tau Malu’i Fonua, na’e kau ai ‘a e ‘Eiki alemia Tonga, Toketa Feleti Vaka’uta Sevele; Minisita ki Muli, Tau Malu’i Fonua mo e Kovana Le’ole’o ‘o Vava’u Sonatane Tu’akinamolahi Taumoepeau Tupou, Minisita ki he Transport Paul Karalus, ‘Amapasitoa ‘Amelika Larry Dinger mo hono hoa, ‘Amapasitoa Siaina Hu, Konisela Fakalangilangi ‘o Siamane Carl Sanft, Konisela Fakalangilangi Falanise Tupou Pasikala moe kau ma’olunga ‘o e pule’anga kae’uma’a e kau pisinisi.
Ko e va ‘o e Potungaue Taumalu’i Fonua ‘o Tonga mo e ngaahi fonua Hau ‘o mamani ‘oku vaofi ‘aupito pea kau foki ia ki he fakalakalaka ai pe ki mu’a ‘a e ako mo e langa ‘a e potungaue ni. ‘Oku ‘amanaki foki ke tufa atu mo tu’u ‘i he pepa ni ‘a e ngaahi ongoongo meihe pepa fakamahina koia ‘a e Potungaue Tau Malu’i Fonua, ‘oku iloa ko e PIUTAU.
More Pictures of this event here
Kau malini Falanise moe 'Amelika
Kau malini fefine meihe manuvao 'Amelika koe USS JOHN PAUL JONES
Fakakahoa seniale Falanise he tu'uta kihe fakaafe fakalangilangi kau sotia Tau Malu'i Fonua Tonga
