Na'e tau mai ki Tonga ni he 'aho 21 Fepueli 'a e fakafofonga falealea 'o 'Amelika, Congressman Eni Faleomavaenga, ko 'ene 'a'ahi 'aho 'e tolu. Na'e fefolofolai ai mo 'Ene 'Afio, Siaosi Tupou V 'i "Villa" 'i he 'aho tatau pe. Na'e hoko atu ai ki he 'ene ngaahi feme'a'aki pea mo e 'Eiki Palemia, Dr. Feleti Sevele, MinisitaPa'anga, Sosiua 'Utoikamanu; Ako, Dr. Tevita Palefau pea mo e Ngoue; Sione Peauafi Haukinima. 

 

Ko Hunkin foki ko e fakafofonga ia 'o Ha'amoa 'Amelika ki he falealea 'Amelika, Congress. Neongo 'ene kau ko'eni ki he falealea mo e ngaahi komiti 'i ai 'oku 'ikai ke kau he hikinima ki ha lao, he 'oku 'ikai ko ha siteiti 'a Ha'amoa 'Amelika. Ka 'oku tokoni lahi foki 'a 'Eni Hunkin ki he ngaahi fonua kaunga'api he Pasifiki ki he 'enau takitaha ngaue fakalakalaka faka komiuniti. 'I he katoanga'i ko ia 'e he komiuniti San Francisco Bay Area 'a e Tonga National Day 'o e 2006, na'e kau atu ai 'a Hunkin ki he kau fakaafe fakalangilangi. Na'e kau fakataha foki ai mo e konisela seniale malolo, Tevita Kolokihakaufisi 'i hono fakafiefia'i 'a e 'aho mahu'inga ko ia ki he kainga Tonga 'i 'Amelika.

 

Ko ia na'e fiefia lahi ai 'a 'Eni Hunkin 'i he 'ena toe fe'iloaki mo Tevita 'i hono talitali ia 'i mala'e vakapuna 'i he 'ene tau mai ki Tonga. Ko e hako foki 'a Hunkin 'o e Ha'a Liufau 'i Ha'amoa ka ko 'enau tupu 'i he famili 'o Liufau mei Ha'ano 'a ia ko e tautehina 'o e Tu'i Ha'angana.

 

 

END