KUO FOLOFOLA 'A TUPOU: FAKAFETA'I ! PEA KE NE LAKOIFIA 'O FUOLOA!

Ko e Folofola e mei he Taloni 'o Tonga, 'a hotau Tu'i 'Ofa. 'Oku makatu'unga ai 'a e fakafolau atu, 'i he 'ea hauhau 'o natula, 'a 'e mau Fakamalo moe 'Ofa lahi ki Ho’o 'Afio na, Tama Siaosi Tupou V. Ko e To Folofola mahu'inga 'eni kia kimautolu si'i kainga Tonga 'i Tonga 'Eiki pea mo e Kolope. 'Oku mau ongo'i loto hounga'ia lahi, Homau Tu'i, 'i ho'o veteange 'a 'emau ongo'i mafasia moe manavahe na'a mau tofanga ai 'i he vavale 'o ho mau loto, lolotonga 'a e fakamafasia lahi kuo pulonga ai ho tau ki'i fonua masiva he ngaahi 'aho kuo toki maliu atu. 'Oku fakalotolahi'i ai kimautolu, 'E Ho'o 'Afio, ke mau tu'u 'o ngaue 'i ha founga fefalala'aki 'o hange ko ho'o folofola.

Kuo mau ongo'i kuo mau hao kihe fonua momoa, 'i he Folofola Faka Tauhi Sipi Lelei, kuo mau taulanga hao ki ai. Kuo mau maatatonu ki he 'Ofa 'a e 'Eiki Mafimafi, na'e fakafoua mai 'i Ho’o Folofola ko e Tu’i ‘o e ‘Otu Tonga. 'Oku mahino mai kia kimautolu kainanga, ko e 'Afio na ko ho mau Malu'anga mo e Tamai fakamamani. 'Oku fakahoko 'a ho'o folofola 'o kapuekina 'a ho kainga kotoa, 'o tatau pe ki he talangofua mo e talangata'a, he ko e talatalaifale moe akonaki ki he Fale Malohi pe 'e Taha. Ko e ngaahi faka'amu 'a Ho’o ‘Afio na, moe ngaahi talateu ki he ngaue ma 'a e kaha'u ho tau fonua, te mau to'oto'o ia ko e tohi fakamanamanatu 'i ho mau loto. Te mau fakahoko ia 'o hange ko Ho'o 'amanaki. Temau lau ia ko e vesa koula ki ho mau nima, mo e kahoa siueli 'i ho mau uma. 'E 'ikai ke to kelekelea ho'o folofola. Pea ko 'e mau palomesi 'emalata ia ki he 'Afio na.

Ko e kau sevaniti talangofua 'A e 'Afifio na.

Matu'a ngaue 'a e Tonga USA Today